2010年6月14日星期一

打擂台("Gallants") ------ 拍出新意的港產片,打出武打片另一片天!
























片名 : 打擂台 (2010)
導演 : 郭子健,鄭思傑
演員 : 梁小龍,陳觀泰,泰迪羅賓,邵音音,黃又南,賈曉彤,陳惠敏,羅莽
片長 : 97 分鐘

1. 記得第一次知道"打擂台"是見到街邊poster,完全唔知是套戲,還以為真是打擂台宣傳廣告,後來見過幾次也只是想到或許是甚麼話劇!

2. 直至在戲院看到trailer才真相大白,其實trailer是拍得吸引,雖然睇完都唔知套戲講乜,不過已引起我的好奇心,而且那種70s feel就是有一種吸引力!

3. 看之前仍不算有太大期望,所以也不是一上畫即看!結果整個觀賞過程也覺相當過癮,確是非一般港產片,好似很久未看過一齣這麼有新意的電影!

4. 雖說是舊瓶,不過卻是新酒,而且出奇的好喝!片頭的格局present手法可說是對70s武打片致敬,當然cast亦然,見到陳觀泰,梁小龍就像時光倒流,不過其實我是沒有怎樣看過七十年代的武打片的(except李小龍),如果有看過,效果相信更加不得了!還有那種故事式旁述實在用得好!

5. 後生的又南,賈曉晨完全地失色,淪為大配角,尤其是賈曉晨,一來我從未覺她靚,二來演得極麻麻,又南ok,不過沒進步,最正果場是在醫院一人分飾兩角,被太極羅生玩死!

6. 講全片最出竟然是泰狄羅賓,是一個絕對成功的角色塑造!首先由沈睡中清醒到他一開口那種contrast已能帶出高潮,有他出現的所有場口對白也相當抵死精彩!這可算是全片的驚喜!

7. 而梁小龍等的寶刀未老,硬橋硬馬真功夫,零特技,好似連"威也"也沒用,這就是最好看的功夫武打片,整齣戲的娛樂性超越"葉問2",完全擺脫"葉問"這類武打片的固有方程式,拍出另一片天!

8. 故事簡單,但不重要,重要的是觀賞的過程及那種懷舊得來又能注入新元素的idea!!!

9. 此外,片子亦不是得啖笑,沒主題,打完就算!除了泰狄羅賓的那句: "唔打唔會輸,打就一定要贏!"(這大概是說中了我之前在blog對輸贏及參加比賽的看法),我最欣賞他毫不做作又直接的說"強身健體,去游水,行山,踏單車;學武術,就係要戰鬥",比起很多戲講習武為強身健體,講得正義凜然,轉個頭咪又係走去打!

10. 有時輸贏,未必是完全看個結果,有些東西,明眼人會分辨出究竟是誰勝誰負!正如踢波是入球分勝負,但有些時候是看整體表現,贏場波輸表現,別人也會不服,觀眾也只覺靠運氣!如果能放下成敗論英雄的觀念,誰是真正勝利者其實大家心裡有數,不用說出來,只有被成敗矇蔽一切的人才甚麼也看不見!贏了成就,輸了人格,又有何值得驕傲!

11. 想起泰迪羅賓在片中怒罵:"茶樓就係茶樓,武館就係武館",聯想到現代社會鼓吹變通,有時是為世所迫,有時是為了個利字,不過結果就是不惜犧牲舊有東西的傳統價值,甚至變得不倫不類!

12. 片中也同時揭示了現代社會"打擂台"的陰暗面,一切也只是利字當頭,純粹商業考慮!雖說真正的擂台其實是不受時間場地的規限,不過現實裡也只能私底下低調進行!

13. 戲裡的角色幾乎個個都有打,獨欠了陳惠敏,還期待他會露兩手,點知失望!也許正反映他的現實,"現在已不是拳頭打天下的年代"/ "拳怕少壯",所以角色也貫徹始終!

14. 片尾曲由葉振棠翻唱自己的舊歌"大俠霍元甲",加上一段rap,配合片子的theme及新舊交替的idea,聽得同樣過癮!

7 則留言:

  1. Good Jack, you've said everything i want to say about this move. "舊瓶新酒,出奇的好喝",對極了。
    1.譚炳文的 VO 是一絕。最後 quote 一段英文(可以告訴我完整原文嗎?忘了。),過癮之餘,更有深意,好得。
    片頭的credits 剪影設計,70s feel 濃得化不開。
    2.陳惠敏無打,但見他身形 fit 爆,似港版 clint eastwood,又係好嘢。
    3.講懷舊勵志,堅實、誠實,假貨如“歲月乜乜”之流,唔該行埋一邊。
    4.dictionary meaning of 'gallant':
    Unflinching in battle or action;
    brave and high-spirited; courageous and honourable. ‘打擂台’果然是最佳演譯。

    回覆刪除
  2. 我真係想睇呢齣戲,D海報好靚啊!所以我唔會睇呢篇影評住...

    回覆刪除
  3. yeah, molly. the poster is marvelous. 一定要睇呵!

    回覆刪除
  4. 1.段英文我都唔記得!睇下有無機會睇多次!
    2. 港版 clint eastwood,妳個聯想好正!
    3. 是啊!拍得出奇流暢!
    4. gallant我當然要查字典先識啦,原來咁有意思!

    Molly快D睇啦,希望妳有同感!

    回覆刪除
  5. 好好好,我一向至愛70s的人和事,淨係呢個point已經好吸引到我。呢幾日忙到瓦燒,希望能趕在明天下午前忙完,鼠出去看 ^_^q (Jack, 呢個就係我咁耐比睇你篇Fan Fan的原因,我想有更多時間慢慢睇&feedback呀 :)

    回覆刪除
  6. 原來fanfan妳還未看,還以為妳看了未得閒comment,不過妳慢慢啦,一頭半個月都ok,因為我俾妳的feedback有時都勁耐!

    回覆刪除
  7. 我今日睇了,Jack, 好在睇之前冇睇過你呢個 Blog, 否則會好無癮,你把最正的寫了出來,有無諗過下次寫完後,等大家睇完套戲,先公開你的影評 ???

    其實我覺得套戲好一般,可能你講得太好,我期望太高吧。同埋,我當入場前知道泰狄羅賓咁勁,已經冇咁好睇了。

    我最喜歡片內的美術,我也想去這間茶樓〔如果它真的存在的話〕,我最喜歡那句『有陽光的地方,便有黑暗』,噢!我連呢句都爆了,未睇的,真的未必要去睇。

    但係片尾首歌,係令我冇睇晒 roller 便走的原因。

    整套戲最好睇係笑位同打戲,但最後個場打戲,就拍得太差太冇說服力太牽強了。

    套戲不是零特技,你認為又南真的會被打到飛起嗎?

    回覆刪除