2010年5月15日星期六

維多利亞壹號("Dream Home") ------ 一齣只懂賣弄暴力色情的爛片,不知所謂!
























片名: 維多利亞壹號 (2010)
導演: 彭浩翔
主演: 何超儀/ 陳奕迅/ 徐少強/ 鮑起靜/ 葉璇/ 谷祖琳/ Juno/ 周俊偉
片長: 94mins

1. 我以前也講過,我覺得彭浩翔從來都係找著一個好sharp的idea,然後把它發展成一齣戲,可惜他功力不足,結果戲總是有點拖長嚟做,欠缺張力!不過呢套仲弊,sharp idea都無埋,完全係借題發揮,搵戲嚟做,得個"誇"字!

2. 如果話係寫實片,就完全無說服力!說用極度誇張手法反映香港樓市把人迫瘋的現象,卻又完全唔make sense,加插何超儀兒時對Dream Home的憧憬試圖去解釋她的心理又過於表面,劇本完全失控!


3. 那些極度暴力的殺人場面,色情元素及那些indecent的淫賤對白的枝葉,完全係堆砌,bad taste得很(我唔係唔接受呢D淫賤對白,只係放在一個這樣題材的戲中,絕對無謂)!根本上好似係借個題材滿足導演的個人拍暴力色情場面的用心!

4. 看著那些暴力場面,我想起Michael Haneke的戲,不過彭浩翔拍出嚟就完全唔係果回事!仲有佢果D暴力色情還刻意加些笑位,簡直係cheap,我覺得佢滲咗D"From Dusk Til Dawn"的影子(色情淫賤恐怖暴力笑料粗口乜都有,劇情同樣完全失控,真係估佢唔到),可惜人地係cult片,令人睇得超過癮,彭浩翔就眼高手低想學人,慳D啦!


5. 都唔知套戲想點,寫實又唔係,cult片又唔係,應該話係一套扮寫實,實則內容空洞只懂堆砌的戲!

6. 還有那些不斷穿插的剪接,我覺得做得一點也不出色!

7. 戲的opening仲key"based on a true story",然後又key: original story彭浩翔,咁即係點?我覺得佢完全濫用"based on a true story"呢個term,佢知唔知"based on"與"inspired by"嘅分別架!

8. 竟然有我零興趣嘅葉璇,好彩淨係出咗幾幕,真係早死早著!

9. 最值得讚係何超儀拿刀似畫的poster,另外三款亦不錯,不過心諗又唔知係邊度抄翻嚟!

5 則留言:

  1. 首先我要否認我欣賞彭浩翔,我欣賞的是他某些sharp idea, 我只係覺得佢係有個人之處,很食腦,識捉觀眾心態,所以才可以在這行撈下去!不過,從電影中也看得出他這個人低品味!

    "買兇拍人"真係好正,其實"大丈夫"我都鍾意,起碼看的過程愉快,"伊莎貝拉"太扮王家衛,所以有點抗拒,不過都算ok,而"出埃及記"只係好鍾意個idea同埋與戲名的無限聯想,套戲又係拖!反而,我幾鍾意"公主復仇記",可惜同樣張力不足,未夠緊湊!

    "只要語出驚人,毋須仔細經營成件事"絕對同意,所以才會感到咁唔make sense!

    poster竟然有四款,而且落本做宣傳,我相信係有人貼!妳最喜歡的那款更是專登找齊演員去另外拍,確是有誠意!我都話過幾差嘅片我都會找到它"可愛"之處,對電影我係最唔mean的了!

    回覆刪除
  2. 彭浩翔,算把啦!何超儀,會做戲的嗎?如果你送一個『唯臺』的單位比我,我可能考慮去睇〔都唔係一定睇!〕。哈!

    回覆刪除
  3. 『唯臺』= 維壹, 打錯字。

    回覆刪除
  4. Jack, 其實你不用煩買樓的東西,所以你對呢套戲一定冇共嗚!

    回覆刪除
  5. 問題係,我相信就算要煩買樓都唔會找到共鳴!我唔信為咗買樓走去殺D無辜嘅人,完全唔make sense!

    回覆刪除