2010年4月5日星期一

小雙俠("Yatterman") ------ 超爆笑,全場反應雷動!

























Film : 小雙俠 ( Yatterman) (2009)
導演:三池崇史
演員:櫻井翔、福田沙紀、深田恭子、岡本杏里
片長:119 分

1. 今天連續走兩場HKIFF,結果要由圓方"飛的"去文化中心,加埋票價,即是要$90,看完齣戲,仍覺相當值得!

2. 唔講套戲住,一定要講吓現場,去到已遲了10分鐘,不過仲見到opening credit,應該不是miss了太多吧!文化中心要開upper circle,證明好多人買飛,好耐未試過咁多人睇一齣戲,可惜離銀幕太遠,因此sound effect都差D!不過現場的反應出乎意料的好,很多場口也全場大笑,甚至拍晒手掌,一些接吻場面也起晒哄,好耐未試過看戲咁有現場氣氛!我相信其中一個原因是好多日本人睇,尤其是日本妹,我前面也坐了幾個,仲有好多細路!雖知日本偶像組合"嵐"的其中一員櫻井翔做小雙俠播,而"嵐"是這兩年全日本最受歡迎的偶像組合,相信香港同日本都有唔少歌迷去看,我好欣賞日本歌迷的團結,睇戲當正睇演唱會,絕不吝惜俾反應!就算去到ending credit,re-cap之前的片段都一樣俾反應,一樣大笑,見到roller出: 主題歌-----嵐: Believe都全場起哄,對我來說是一個非常愉快的看戲體驗!希望會上正場,我想再睇,不過當然我知一定不會有相同反應!有這些現場氣氛,套戲也會變得正了很多!


3. 其實我本來對日本做經典卡通的真人版通常不抱期望,不過呢套真係好搞笑,而且有太多兒時回憶,不記得當年是甚麼時間做的,大概是八十年代頭吧!在我心中是一套經典卡通,非常反傳統,D壞人仲出位過好人,而且佔戲又重,好多gimmicks也是出自壞人,每次出場的開場白都好好笑,又各有自己的主題曲(都係壞人的好聽D),每一集任務都係失敗,而且仲要接受骷髏大王的大懲罰,次次花樣不同,不過最後都係爆炸然後全部人變晒黑面,每集都好期望佢地點樣無端端啟動了懲罰裝置!當然,仲有經典過場: 豬仔都識爬樹!


4. 套戲基本上滿足晒我,所有經典場面對白都有出現,又有娛樂性,又有咸濕嘢,愛情線又爆笑!場景也相當迫真(當然D特技都係好流),而且佈置他很華麗,看到深田恭子粉紅色的浴室,美極了!亦勾起我很多回憶,本來已忘了的場口也再次重現,仿似回憶也返了來!佢仲好忠於卡通版的用語,相信當年日文直譯也不是這樣的,好多係地道嘢,就好似甚麼"小雙俠打敗敵人頂瓜瓜",聽到已笑了出來!仲有乜嘢小雙俠係代表純潔,正義,美麗,大叫口號,D壞人就不斷歌頌做壞人如何正,又緊張又刺激又好玩............其實我覺得好有哲理,做壞人真係好玩好多!


5. 還有小俠狗,已遺忘了的"能量骨頭",機械人兵團;笨賊三人組每次接到命令就要當骷髏大王親臨,要全體下跪,宣佈完任務那個裝置又會爆炸,每次也替他們慘,壞人角色竟是可憐角色,認真反傳統,那個骷髏大王又真係太刻薄又衰格,連每次製造機械人也要佢地自己賺錢,看著他們怎樣騙財又係好好笑!仲想講,每次失敗爆炸完後後他們也會騎著三個輪的單車,看到他們在黑夜的展影,怪可憐的! 


6. 好多香港觀眾當然會focus係深田恭子做笨賊三人組首領,都頗像真,又夠sexy,只是她確比原裝卡通的肥,而且把聲太柔,不過造型殺晒!而且看到她的夢想只是做個平凡的家庭主婦,每天等老公返家,真估不到,不過那個場面又係全場大笑!無論如何,佢個角色仍然係全套戲最出的,雖然我不是特別鍾意深田恭子,不過我鍾意戲中嘅佢,好得!


7. 基本上套戲好卡通,又夠誇張,但忠於原作,完全滿足到我!我寫這篇時心情仲係好high,仲係一邊狂播著小雙俠主題曲插曲!不過印象中呢套卡通好少重播,好想睇翻,如果有DVD我都想儲!突然好想買"豬仔都識爬樹"玩具!


8. 當然,如果你沒有看過從前的,又或是你太細,不是那年代的人,可能沒法代入,覺得套戲超無聊又胡鬧!無奈,我真係覺得好好睇!

9. 1977電視版Opening(小雙俠主題曲):  http://www.youtube.com/watch?v=DK5Ap_BC1f8
1977電視版Ending(笨賊三人組主題曲): http://www.youtube.com/watch?v=BnWG9xuLE80
笨賊三人組主題曲深田恭子現場版(必看): http://www.youtube.com/watch?v=MeykfROlSkk&feature=related
2009電影版Trailer: http://www.youtube.com/watch?v=aIhZffs-fPo&feature=related

10 則留言:

  1. 我都係睇完套戲至知有新版!其實套卡通都有D咸味,一定要cut嘢!

    係呀,同埋睇HKIFF,真係好戲會完場時全場會大拍手掌,係好正嘅感覺!

    回覆刪除
  2. 由於我笑得太大聲,前面個日本妹回頭望了我幾次!

    回覆刪除
  3. 我又唔覺得扮識貨,起碼我唔係咁嘅心態,我都會拍,我覺得係禮貌同埋尊重套戲,套戲如果有生命,佢都會開心D,無人拍佢會好可憐!當然如果套戲好睇,我會拍大力D同埋耐D!其實如果上正場的戲,好就可以拍都幾有feel,不過似乎香港無這個文化!

    可惜戲院太暗,我地都望唔到對方嘅樣,所以佢散場開燈都有再望,我諗佢想知笑咁大聲果個係乜樣!

    回覆刪除
  4. 我都唔排除有呢D人!不過如果連HKIFF都無呢D嘢就仲弊!可以咁諗,有D假人拍先,幫D真係想拍嘅人打吓氣,如果唔係,我都未必夠膽拍!

    回覆刪除
  5. 無錯無錯,佢地都好有貢獻架!

    回覆刪除
  6. 突然諗起近幾年看HKIFF,我最有feel係在文化中心睇"Once",對我來說整齣戲也是高潮,我不是講戲本身的戲劇性,而係我心中泛起的!完場真係拍咗好耐,好感動,好似全場人都好鍾意套戲!我當時真係覺得自己好識貨又好彩,揀咗呢齣戲嚟睇!後來有得上正場又入了Oscar,真係令我好興奮!

    我知我一鍾意起一樣嘢就有D顛,上正場又翻做結果再睇咗兩三次,買咗港版DVD又買埋日版,因為有making-of,訪問,首影禮及現場表演!當然又買埋soundtrack,仲要追埋男主角隊Band的CD,男女主角的合輯又買晒,演唱會DVD又買,簡直痴咗線,不過我會痴落去......好耐未試過睇一齣戲有咁大咁多side effects!

    回覆刪除
  7. 吓,妳有齣戲但係未睇過,搞到我情緒有D激動添!不過我那種鍾意之情與第一次睇時的情緒氣氛已不可分割,加上妳知我對講音樂的電影特別有興趣,希望妳看時可以保持平常心,不要抱太大期望啊!

    好喜歡妳那句"見佢熬出頭來",絕對說中了我的心聲!好記得他倆上Oscar台給我的感動,有點dream comes true的感覺!可惜我試過係youtube找想看翻,但係找不到!

    回覆刪除
  8. me too, i like it very much!!! especially
    1977電視版Ending(笨賊三人組主題曲): http://www.youtube.com/watch?v=BnWG9xuLE80

    hahhahaha, 多弄姿好正!

    回覆刪除
  9. Stacia, 好多謝你的意見!

    是啊,那歌好正,我也有小雙俠的歌曲集CD呢!

    回覆刪除
  10. p.s. Stacia, 除了我的朋友,你是少數讀者會留下意見的,很開心呢!Really thx so much!!!

    回覆刪除